ඔන්න ඉතින් වෙනද වගේම අපි සඳුදා ඉස්කෝලෙට ආවා කියමුකෝ.... කට්ටිය ඔක්කොම සුපුරුදු පරිදි වැඩ. වෙනදා වගේම එදත් පළවෙනි විෂය සංයුක්ත ගණිතය. හැබැයි වෙනද හරිම සැහැල්ලුවෙන් භාවනාවක් කරනවා වගේ අපිට උගන්නන අපේ "පියෝ" සර්ගෙ මූණ නම් එච්චර හොඳ නෑ. පන්ති නාමලේඛණයත් අත් දෙකෙන්ම තුරුළු කරගෙන එහෙට ඇවිදිනවා මෙහෙට ඇවිදිනවා..... අපිට තේරුනා මොකක්හරි අමුත්තක්, වෙනදා විනාඩියක් අපතේ යවන්නේ නැතිව පන්තියේ එවුන් අහගෙන හිටියත් එකයි නැතත් එකයි කියලා ආපු වෙලේ ඉඳන් උගන්නන සර් අද මුකුත් කථා බහක් නෑ...
ටිකක් වෙලා එහෙම හිටපු සර් පන්තිය දිහාට හරිම කණගාටුවෙන් වගේ මෙහෙම කිව්වා
"මේ පන්තියේ ඉන්නවා හරිම තිරිසන් ළමයෙක්, විෂඝෝර සර්පයෙක්ටත් වඩා අන්තිම භයානකයි... මේ මනුස්සයා මට ගිය සිකුරාදා එයාගේ අයියගේ මගුල් ගෙදර එන්න කියලා මට ආරාධනා කරා... මම ලෑස්තිවෙලා ##### රෙස්ට් හවුස් එකට ඔය කියපු දවසේ ගියා.. හැබැයි එතන හිටපු අය මට කිව්වේ ... අයියෝ මේ හොටෙල් එකේ මාස ගාණකින් වෙඩින් එකක් ති‍බ්බේ නෑ කියලා.. මම තෑග්ගට දෙන්න මෙන්න මේ පොතත් අරගෙන ගියේ" කියලා අපිට බණ පොතකුත් පෙන්නුවා...
( මේ වෙලාවේ රාජා පන්තියේ හිටියේ නෑ... ඔය කථාව කියන අතරේ වැඩිපුරම බලාගෙන හිටියේ අපි දිහා කියලා නම් හොඳට තේරුනා.. අපිනේ රාජාගේ ලඟම මිතුරෝ)
දැන් ඉතින් කාලා වරෙන්කෝ... සර්ට ඔහොම තරහා ගිහිල්ලා මදි නොවැ මේ යකා කරපු මේ වැඩේට...
සාමාන්‍යයෙන් රාජා පන්තියට එන්නේ 8.45 ට විතර. ගොඩක් දුර බැහැර හින්ද එහෙමත් නෙමේ ඒක පොරගේ පුරුද්දක් වගේ වෙලා ති‍බ්බේ. ඉතින් වෙනද වගේම මෙන්න පොර පන්තියට ආවා, සර්ට Good Morning කියාගෙනම මූ හිනාවක් දාලා ඇහුවා....
"සර් වෙඩින් එකට ආවේ නැත්තේ ඇයි කියලා"
සර් වචනයක්වත් කිව්වේ නෑ කෙලින්ම ගියා උඩ තට්ටුවේ විදුහල්පතිතුමාගේ කාමරයට.
වැඩි වෙලාවක් ගියේ නෑ සුදොසුදු වතින් සැරසුන මහා සද්ධන්ත පුරුෂයා අපේ ගරු විදුහල්පතිතුමා පන්තිය ගාවටම අවා.... රාජාට පන්තියෙන් එලියට එන්න කියලා හරිම දායාබරව කිව්වා. රාජා පන්තියෙන් එලියට ගියේ වීරක්‍රියාවක් කරපු ටින් ටින් වගේ.. වැඩි වෙලාවක් ගියේ නෑ අළුත් අවුරුද්දට අර මොනවද පුපුරවනවා වගේ චට පට චට පට ගාලා ආපු සද්දෙට මුළු හොල් එකේම ළමයි සහ ගුරුවරු එලියට බැහැලා බලාගෙන හිටියා.
එදා නම් විදුහල්පතිතුමා රාජාට හොඳට සැලකුවා.... මෙහෙමත් කිව්වා
"තමුසෙට ලැජ්ජා නැද්ද මේ වගේ අහිංසක ගුරුවරයකුට ඔය වගේ ජරා වැඩක් කරන්න? දැන් පන්තියට යනවා..."
එතකොට අනේ අපේ පියෝ සර් කිව්වා
"අනේ සර් මට නම් බෑ මෙයා ඉන්න පන්තියට උගන්නන්න"
වෙන මොනවා කරන්නද රාජාට ඒ මොහොතේම ස්ථාන මාරුවක් ලැබුනා "ඒ" පන්තියට.......
ඔය සිද්ධිය වෙලා අවුරුදු ගානකට පස්සේ ( හරියටම අවුරුදු 09 කින් විතර) දවසක් මට රාජා කථා කරා....
" මචං පොඩි ආරාධනාවක් කරන්න තියෙනවා, අපේ අයියගේ මගුල් ගෙදර තියෙනවා උඹ එන්නම ඕනේ "
හිතා ගන්න පුළුවන් නේද මට හිතුන දේවල්
ප/ලි: හැබැයි ඇත්තටම උගේ අයියා බැන්දා... මායි තව යාළුවෝ දෙන්නෙකුයි වෙඩින් එකට ගියා, දැනට මාස දෙක තුනකට කලින්...
හැබැයි පියෝ සර් නම් ඇවිත් හිටියේ නෑ
මේ සිද්ධිය උනේ අපි උසස් පෙළ කරන කාලේ. අපේ යාළුවෝ සෙට් ඒකේ හිටපු අමුතුම ජාතියේ පොරක් තමා රාජා, හැබැයි ඉතින් ඕන වැඩකට රෙඩි වගේම පන්තියෙත් හිටපු හොඳම බ්‍රයිටා ( රිසල්ට් එනකන් ඒ බව දැනගෙන හිටයේ අපි විතරයි, වෙන අය වගේ පොර ගුරුවරුන්ට ලකුණු දාගන්න ගියෙ නැති නිසා ගුරුවරුත් පොර ගැන දන්නේ නෑ).
මේ කථාවේ අනෙක් ප්‍රධාන සාමාජිකයා තමයි අපේ පන්ති භාර ගුරුතුමා.. හරිම අහිංසකයා. කොච්චර අහිංසකද කියනවානම් අපිට කලින් හිටපු අයියලා එතුමට නමක් දාලා තිබ්බා "පියෝලතා" කියලා. සර් අපිට ඉගැන්නුවේ සංයුක්ත ගණිතය, කලින් කරලා ති‍බ්බේ ශුද්ධ ගණිතය (හිතා ගන්න පුළුවන්නේ නමේ වරුණ). හැබැයි ඉතින් මොකද්දෝ නරක වෙලාවකට පියෝට රාජවත්, රාජාට පියෝවත් පෙන්නන්න බෑ.
දවසක් අපේ තව හොඳම ගජයෙක් එක්ක රාජා ඉස්කෝලෙට ආවේ විනාඩි 45 විතර පරක්කු වෙලා. උන් දෙන්නගෙම හොඳ වෙලාවටද කොහෙද ගරු විදුහල්පතිතුමා නම් පේන තැනක ඉඳලා නෑ. පන්තියට ආපු රාජගේ අතේ බුලත් අතක් තිබ්බ හින්ද මම ඇහුවා "මචං මොකද බුලත් අතක්" කියලා. රාජා දීපු උත්තරේට මට ටිකක් විතර මලත් පැන්නා. "අපේ අයියගේ වෙඩින් එකට සර්ට ආරාධනා කරන්න ගෙනාවේ මචං" කියලා මෙන්න රාජා කියපි.... ඇයි යකෝ අයියගේ වෙඩින් එක අපිටවත් කියන්න කලින් සර්ට කියන්නේ මූට පිස්සුද ?
සර් වෙලාව ඉවර වෙලා පන්තියෙන් එලියට යනවත් එක්කම නැගිටලා ගියපු රාජා බුලත් අත එහෙම දීලා සර්ට කථා කරලා ආව.. ආපු ගමන් ඉතින් අපේ එවුන් ටික වටකරගෙන රාජා ට පළු යන්නන බනින්න පටන් ගත්තා. (වෙඩින් එක අපිට නොකියපු තරහට) හැබැයි ඉතින් ඌ දුන්න උත්තරේට කට්ටිය හොල්මං.....
"උඹලට වෙඩින් එක කියන්න අපේ අයියා බඳින්න ඒපැයි බං"
"එහෙනම් උඹ සර්ට ආරාධනා කරේ" මං ඇහුවා
"නිකං බං" (පිස්සුද මූට)
බලන කොට වෙලා තියෙන්නේ මේකයි, මූ උදේම අපේ තව යාළුවෙක් එක්ක මොකද්දෝ සාත්තර සීන් එකකට බුලත් එහෙම අරගෙන පන්සලකට ගිහිල්ලා. හැබැයි වෙලාව පරක්කු හින්දා වැඩේ කෙරිලා නෑ. ඉතින් එන ගමන් මූට ඇවිල්ලා මහා කුප්ප අදහසක්. ඒක තමයි මූ සර්ට බුලත් අතක් දීලා කියලා තියෙන්නේ අයියගේ මගුල් ගෙදර තියෙනවා කියලා...
ඔන්න ඉතින් අපි ඔය සිද්ධියට හිනා වෙලා ... කථා කරලා හිටියට දවස ගෙවෙද්දි අපිට ඕක අමතක වෙලා ගියා ... එදා සිකුරාදා දවසක් නිසා දවස් දෙකකට පස්සේ තමා ආයේ අපි හම්බ වුනේ....
ඔන්න ඉතින් වෙනදා වගේ අපි සඳුදා ඉස්කොලේ අවා කියමුකෝ..........
විහිළුවට වුනත් කරපු වැඩේ බරපතලකම අපිට විතරක් නෙමේ රාජා ටත් තේරුනේ එදා තමා.
ඔන්න ඉතින් හා පුරා කියලා මාත් පටන් ගත්තා මෙව්වා එකක්. ඒත් ඉතින් මෙතැනින්ම මේකේ ආරම්භයත් අවසානයත් සිද්ධ වෙයිද කියන එක තමා මට තියෙන බය. හරියට ඉස්කෝලෙ යන කාලේ ඩයරි ලිව්වා වගේ. අළුත් අවුරුද්දක් පටන් ගන්න කොට අපෙ තාත්තගෙන් හරි කාගෙන් හරි මට හම්බ වෙනවා නොවැ ඩයරියක්. අනේ ඉතින් මාත් පළවෙනි සතිය විතර කාපු බීපුවා ආගිය තැන් යාළු විස්තර පන්තියේ මොකද වුනේ... ඔය ඔක්කෝම හෑලි ටික ලියනවා ඕකේ. සතියක් දෙකක් යද්දි දවස දෙක හැලිලා යනවා. මාසයක් විතර මතක් කර කර ලිව්වත් අනේ ඉතින් මාස දෙක යනකොට නම් ඩයරිය අල්ලන්නෙවත් නෑ. හැබියි ඉතින් දැන් නම් හිතෙනවා අනෙ අපරාදේ කොහොම හරි ලියන්න තිබ්බා කියලා. මොකද කියනවනම්.... අර අමාරුවෙන් හරි ලියපු මාසේ දෙකේ විස්තර දැන් කියවන කොට හරිම ෂෝක් අප්පා. කමක් නෑ දැන් ඉතින් ගිය හකුරට නාඩන්නේ තියෙන මෙව්වා එක රැක ගන්නේ කියලා මේ වැඩෙත් කොරලාම බලමුකෝ. එහෙනම් ඕං හැමෝටම ආයුබොං කියලා මාත් පටන් ගන්නවා මගේ රා..කළස.... (එහෙම කිව්වට මේක රා කළයක් හෙම නෙවෙයි හොදේ)
